Cangiaru lu Guvernu / pi n’antri nenti cangia
cu si fa piecura / lu lupu si lu mangia
manca sulu la tassa / ncapu lu macinatu
ca tutti l’antri cosi / hannu già aumentatu.
Sarbammu l’Italia /ca rischia lu tracollu
“a iddru ca è narisi“ / a stu populu bracollu
ddra “cosa” nculu a l’antri / pari filu di jina
e li latruna ngrassanu / tiniennuni a la catina.
Scurciati comu piecuri / quannu callia lu suli
nirbati di muntata / comu fussimu muli
lu Guvernu è sempri chiddru / fattu di patruna
cu cumanna fa li liggi / a stu populu di mignuna.
Si vua la pensioni / ti la dammu a sittantanni
ntantu lu tiempu passa / e mueri cu li malanni
pariemmu tanti piecuri / tutti surdi e muti
mentri li carni ni muzzicanu / sti piezzi di curnuti.
Chistu è lu mumentu /di un gran sullevamientu
comu li tiempi antichi / cu li banneri a vientu
siccomi tutti siemmu / di panza ammarazzata
calammu la testa nterra / comu fussi allazzata.
Caniattì li tri di Innaru
Totò Treppiedi
