Riceviamo e pubblichiamo 2 poesie di Totò Treppiedi:
10 anni di Sinnacatura !!!!
Caniattì 30 giugnu 2006
Lu ” 1° Balluttaggiu “
Si ni vannu finarmenti / a la casa li Cummissari
e ccu iddri si ni vannu / certi stori dunci e amari.
Torna arrieri la Pulitica / di li vasati e abbrazzi
a Sinnacu di lu paisi / si candidaru du carcarazzi.*
Una è signurineddra / abbirsata, simpaticuna
darrieri genti di panza / e pulitici cu li c………
l’antru è omu di populu / veru e propriu brualinaru
però avi un difittieddru / parla sulu carcararu.
L’intinzioni è di purtari / lu prugressu a nova vita
si ni vannu a cuntu d’iddri / nun canuscinu la zita,
ma lu populu sciglì / granni maggiuranza vera
chiddru c’avi li supracciglia / cu la forma di pampera.
Ma un tintu cunsigliu / però ci vinni datu
megliu curriri sulu / ca malu accumpagnatu,
sta cosa ci piacì / si misi un punci ntesta
cussì l’antri ncucchiati / ci ponnu fari a festa.
Passannu pò lu tiempu / si potrà addunari
ca cu mangia sulu / si po’ anchi affucari
è certu miegliu aviri / cumpagnia e cunfortu
picchì è facili passari / di la ragiuni a lu tortu.
Caniattì 15 giugnu 2011
Lu ” 2° Balluttaggiu “
Anchi chist’annu a giugnu / si ficiru li bifari
Sinnacu e Cunsigliu eletti / ma cu li piedi papari
picchì poi sta cuntisa / è sempri tra du armali
lu nomi di stu paisi / chiangiemmu li natali.
Ncoddru sta curpa / di stu piccatu originali
custritti siemmu a scegliri / lu peggiu o lu menu mali
cunnanna senza appellu / tristi distinu, ria sorti
allazzammuni li canzi / stringiemmuli cchiù forti.
Pi la secunna vota / vularu ncelu li Cuerbi
cu tanti di ddri voti / ca vittiru nzina l’uerbi
ma forti fu l’ammuttuni / di tanti antri mani
pi futtiri di pinnina / ddru “ poviru “ Tanu Cani.
Ni lu fistinu a la villa / c’eranu sicchi e panzuti
nsemmula a tutti l’antri / ca eranu già vivuti
criaru un sudaliziu / c’assumiglia a na paranza
cu sà quarchi muddrica / ci arresta ni la panza.
Totò Treppiedi
